நேற்று! இன்று!! நாளை?

ஒரு ஊரில் ஒரு அரசன் இருந்தானாம்! அவன் தன் குடிமக்களிடம் ஒரு மூட்டை நெல் கொடுத்து ஒரு மூட்டை அரிசி கேட்டு கட்டாயப்படுத்துவானாம்!நெல்லைப் பிரித்து எடுக்கும் போது பாதி மூட்டை உமியாகப் போய் விடுவதால்,மக்கள் கைக்காசு போட்டு பாதி மூட்டை அரிசி வாங்கி,ஒரு மூட்டை அரிசியாக அரசனிடம் கொடுப்பார்களாம்!

அரசவையில் பரிசுகொடுப்பது போலக் கொடுத்து பின்னர் தன் வீரர்களை மாறுவேடத்தில் அனுப்பி அவற்றைக் கவர்ந்து கொள்வானாம்!

அரசு கஜானா செல்வத்தை மக்கள் நலத்திட்டங்கள் எனும் பெயரில் தன் வாரிசுகளின் பெயர்களுக்கு மாற்றிவிடுவானாம்!

வெளிநாடுகளில் இருந்து பொருட்களைக் குறைந்த விலைக்கு வாங்கி,தம் குடிமக்களிடம் அதிக விலைக்கு விற்பானாம்!

இத்தகைய  செயல்பாடுகளால் அவனை மோசமான அரசன் என்று மக்கள் தூற்றினார்களாம்!

ஒரு நாள் மரணப்படுக்கைக்குச் சென்ற அரசன்,அடுத்து அரசனாக இருக்கும் தன் மகனிடம் "தனக்கு மக்களிடம் எப்படியாவது நல்ல பெயர் கிடைக்கச் செய்ய வேண்டும்" என்ற வேண்டுகோளுடன் இறந்து விட்டானாம்!

அடுத்து அரசனான மகன்,மக்களிடம் ஒரு மூட்டை உமி மட்டும் கொடுத்து,ஒரு மூட்டை அரிசி கேட்டானாம்.மக்கள் முழு மூட்டை அரிசியும் காசு போட்டு வாங்கிக் கொடுக்க வேண்டிய நிலை ஏற்பட்டதாம்!

இந்த அரசனது வீரர்கள் மக்கள் பணத்தை வரி எனும் பெயரில் நேரடியாகவே கொள்ளை அடித்தார்களாம்!

அரசு கஜானாவில் இருந்த செல்வத்தை எடுத்து நாட்டின் பெரிய பணக்கார்களுக்குப் பங்கிட்டுக் கொடுத்தானாம்!

உணவுப் பொருள்கள் உள்ளிட்ட பெரும்பாலான பொருட்கள் வெளிநாடுகளில் இருந்து இறக்குமதி செய்யப்பட்டு மிக மிக அதிக விலைக்கு விற்கப்பட்டனவாம்!

இவற்றையெல்லாம் பார்த்த மக்கள் "இவனை விட இவன் தந்தை சிறந்தவன் என்றும்,மகனை விட தந்தை நல்லவன்" என்றும் கூற ஆரம்பித்தார்களாம்!

இவ்வாறு தந்தையின் கடைசி ஆசையை மகன் நிறைவேற்றினானாம்!

முக்கியக்குறிப்பு:

இந்தக் கதையை நேற்றைய மற்றும் இன்றைய ஆட்சிகளுடன் தொடர்புபடுத்த வேண்டாம் மக்களே🙂

- அகன்சரவணன்

"போர்! போர்! போராட்டம்!"

தற்போது தமிழகத்தில் எங்கெங்கு காணினும்  போராட்டங்களாகவே இருக்கிறது.தினமும் காலையில் போராட்டங்களின் முகத்தில் தான் தமிழகம் கண்விழிக்கிறது.புறமுதுகு காட்டாத புறநானூற்றுப் போராளிகள் வீதிகளெங்கும் திரிகின்றனர்.

இவற்றுள் ஒருசில போராட்டங்கள் சமுதாய மாற்றத்திற்கு மிகவும் அவசியமானவை.அவற்றை மக்களும் தம் கைகளில் எடுக்கின்றனர்.ஆனால் பல போராட்டங்களுக்கான காரணங்கள் போராடுபவர்களைத் தவிர வேறு யாருக்கும் தெரிவதில்லை!சமயத்தில் போராடுபவர்களுக்கே தெரிவதில்லை!

இவ்வாறு அனுதினம் போராட்டங்களுடனே வாழ்வு என்றாகிவிட்ட மக்களுக்கு,போராட்டம் என்பது இப்போதெல்லாம் போரடிக்க ஆரம்பித்துவிட்டது!

போராட்டங்களை சுவாரஸ்யப்படுத்த வேறு யாரெல்லாம்,எதற்கெல்லாம் போராடலாம்?

நடிகர்கள்:

கதையே இல்லை என்று கடுப்படிக்கும் விமர்சனங்கள்,

ரசிகரே இல்லை எனும் ரகளையான டாக்குகள்,

வயதையும்,விக்கையும் குறித்து வருத்தப்பட வைக்கும் வசவுகள் ஆகியவற்றுக்கு எதிராய் பொங்கி எழலாம்!

அதிகாரிகள்:

கமிஷன்,லஞ்சம்,ஊழல் போன்ற சொல்லாடல்கள்,

அறிவு,அனுபவம்,படிப்பு போன்ற கருத்தாடல்கள்,

கட்சி சார்பு போன்ற கஷ்டமான டாஸ்குகள் ஆகியவற்றுக்கு எதிராய் களம் காணலாம்.

இயக்குநர்கள்:

கதை காப்பி காப்பி எனும் கண் கலங்கச் செய்யும் கண்டனங்கள்,

அடுத்த படத்திலாவது இயக்குநர்... என கிழித்து தொங்கவிடும் விமர்சனங்கள்,

எந்தப் படம் எடுத்தாலும் இது என் கதை எனும் அபாய அலறல்கள் ஆகியவற்றுக்கு எதிராய் கரம் உயர்த்தலாம்.

நடிகைகள்:

பொங்கலுக்கு வெள்ளையடித்தது போன்று என்ற தாங்க முடியாத விமர்சனங்கள்,

நடிகை அழகாக மட்டுமே இருக்கிறார் ஆனால் நடிப்பு? என்ற கொடூரமான கூற்றுகள்,

வயதானதால் முகத்தில் முதிர்ச்சி தெரிகிறது என்ற வன்மையான உண்மைகள் ஆகியவற்றுக்கு எதிராய் ஆற்றலுடன் போருக்கு போகலாம்.

போலிஸ்காரர்கள்:

குனிந்து கால் கட்டை விரலைத் தொட முடியுமா என்ற அபத்தக் கேள்விகள்,

மாமூல் வாழ்க்கை என்ற மறக்க விரும்பும் மெய்மைகள்,

ஸ்காட்லாந்து யார்டுக்கு இணையாக இருந்த காவல்துறை இப்போது என்று சங்கமிக்கும் சங்கடங்கள் ஆகியவற்றுக்கு எதிராக கால்கடுக்க போராடலாம்.

கண்டக்டர்கள்:

சில்லறை இல்லை எனும் சலம்பல்கள்,

படியிலேயே குடியிருக்கும் ரோட்டோர ரோமியோக்கள்,

நிறுத்தத்தில் இறங்காமல் விட்டோரின் சாமியாடல்கள் ஆகியவற்றிற்கு எதிராய் நடைபயணமாய் போராடலாம்.

சாமியார்கள்:

அதிரடி காட்டும் நள்ளிரவு சோதனைகள்,

சிறப்பை சிதறடிக்கும் சி.டிக்கள்,

கைதுக்குக் காரணமாகும் கனவுக் கன்னிகள் ஆகியவற்றுக்கு எதிராய் தியானப் போராட்டம் புரியலாம்.

கிரிக்கெட் வீரர்கள்:

அள்ளித் தெளிக்கும் புள்ளி விபரங்கள்,

என்ன ஆடறான் எனும் ஆயாக்களின் தாளிப்புகள்,

வெற்றியின் விளிம்பில் சடசடக்கும் மழை ஆகியவற்றுக்கு எதிராய் ஓடி ஓடிப் போராடலாம்.

பிச்சைக்காரர்கள்:

குல்லாய் போடும் செல்லாத நோட்டுகள்,

அவ்வப்போது ஆக்கிரமிப்பு என அப்புறப்படுத்தும் அதிகாரிகள்,

உழைப்பு என்ற பிழைப்பைக் கெடுக்கும் சொற்கள் ஆகியவற்றுக்கு எதிராய் அமைதிப் போராட்டம் நடத்தலாம்.

பூசாரிகள் :

நாவன்மையுடைய நாத்திகவாதிகள்,

தட்டுக் காசினை தகர்க்கும் உண்டியல்கள்,

சாமியாடுகையில் சங்கடப்படுத்தும் கேள்விகள் ஆகியவற்றுக்கு எதிராய் தீச்சட்டி எடுக்கலாம்.

கணவர்கள்:

அபாயகரமான அழுகாச்சி சீரியல்கள்,

உயிரே இல்லாத உப்புமாக்கள்,

தலை கிறுகிறுக்க வைக்கும் தள்ளுபடிகள் ஆகியவற்றிற்கு எதிராக தினவுடன் போராடலாம்.

மனைவிகள்:

கணவர்களைக் கிறுக்குப் பிடிக்க வைக்கும் கிரிக்கெட் மேட்ச்கள்,

பேராண்மைக்கு எதிரான பேஷன் ஷோக்கள்,

ஆறே வாரங்களில் சிகப்பழகு என்ற அபத்தங்கள் ஆகியவற்றை எதிர்த்து கோதாவில் குதிக்கலாம்.

கல்லூரி மாணவர்கள்:

இணைய தொடர்பை அந்தரத்தில் தொங்க விடும் ஜாமர்கள்,

செட்டே ஆகாத செமஸ்டர்கள்,

மலைமேல் மலைபோல் வந்து குவியும் அரியர்கள் ஆகியவற்றிற்கு எதிராய் களத்தில் உன்மத்தம் கொள்ளலாம்.

அம்மாக்கள்:

தன் குழந்தையை டோலக்பூரிலிருந்து மீட்கவும்,

குழந்தைகளுக்கு விட்டு விடுதலையான விடுமுறை நாட்களைக் குறைக்கவும்,

தன் அன்பை விட தன் குழந்தை அதிகம் உருகும் ஐஸ்கிரீம்,சாக்லேட் உற்பத்தியைத்

தடுக்கவும் தாய்மார்கள் வீரச்சமர் புரியலாம்.

மாமியார்கள்:

கொடுமைக்கார மாமியார் சீரியல்களைத் தடை செய்யக் கோரியும்,

வரதட்சணை என்ற சொல் வரலாற்றுப் பிழையான இதை எதிர்த்தும்,

தலையணை மந்திரங்கள் தடை செய்யக் கோரியும் உணர்வுடன் போரிடலாம்.

காதலர்கள்:

சுதந்திரம் கெடுக்கும் சுண்டல்காரர்களை எதிர்த்தும்,

கிண்டல் செய்து கீச்சிடும் ஜோக்குகள் நீக்கவும்,

திடுக்கிடச் செய்யும் கூட்டம் நிறைந்த திரையரக்குகள் ஆகியவற்றுக்கு எதிராய் கை கோர்த்துப் போராடலாம்.

சேல்ஸ்மேன்கள் :

அரை நாள் கழித்து எதுவும் பிடிக்கவில்லை எனும் ஏமாற்றங்கள்,

தள்ளுபடியை விட தள்ளச் சொல்லும் தர்ம சங்கடங்கள்,

நின்றே சலிக்கும் நிர்பந்தங்கள் ஆகியவற்றிற்கு எதிராய் பொறுமையாய் போராடலாம்.

குழந்தைகள்:

டிவி,செல்போனில் போடப்படும் பேரண்டியல் லாக்குகள்,

மாலை நேர மகிழ்ச்சியைக் கொல்லும் டியூசன் கள்,

எதற்கிந்த கொடுமை எனும் மாறுவேடப் போட்டிகள் ஆகியவற்றுக்கு எதிராக மார்தட்டிப் போராடலாம்.

அரசியல்வாதிகள்:

குதிரை பேரம் நடக்கையில் குளிர் காயும் மீடியாக்கள்,

எப்போதாவது தொகுதிப் பக்கம் சென்றால் ஏற்படும் மக்களின் முற்றுகைகள்,

வளர்ச்சி நிதிகளில் கிளர்ச்சி செய்யும் ஆய்வுக் குழுக்களுக்கு எதிராய் வேட்டியை மடித்துக் கட்டலாம்.

தமிழக மக்கள்:

பேராட்டங்களால் பொறுமை இழந்து போன தமிழக மக்கள்,போராட்டங்கள் போதுமடாசாமி,இனி போராட்டங்களே வேண்டாம் என ஒன்றிணைந்து போராடலாம்!

-அகன்சரவணன்

நேர்மை - சொல் அல்ல செயல்

ஒரு மனிதனின் வாழ்க்கையில் முக்கியமான இரண்டு வாய்ப்புகள் எப்போதும் இருந்து கொண்டே இருக்கின்றன!ஒன்று,நம்மைச் சுற்றி நடக்கும் விஷயங்களை அப்படியே ஏற்றுக் கொள்வது!அல்லது அவற்றைச் சரியானபடி மற்றும் பொறுப்பை நாம் ஏற்றுக் கொள்வது!சமுதாயத் தீமைகளைக் கண்டு வெறுமனே குறைகூறிப் புலம்புவதை விட,அதனைச் சற்றேனும் மாற்றியமைக்க முயலுதல் சிறந்தது என்பர்.ஏனெனில் தனி மனிதனைத் தவிர்த்தால் சமுதாயம் என்று தனியாக ஒன்றுமில்லை!

அதிலும் சமுதாயத்தில் நேர்மறை மாற்றங்களை ஏற்படுத்துவதில் ஒரு ஆசிரியருக்குப் பெரும் பங்குண்டு.

எமது ஆசிரியப் பணியில் யாம் மறக்க முடியாத நிகழ்வுகளில் ஒன்றாக அமைந்தது,"குறிப்பேடு ஏன் வாங்கவில்லை?"என்ற எமது வினாவிற்கு"பெற்றோரின் ஓட்டுக்கான பணம் கிடைத்தவுடன் குறிப்பேடு வாங்கி விடுகிறேன்" என்ற மாணவனின் பதில்.

இந்த பதில் எமக்கு பெரும் அதிர்ச்சி அளித்தது.நிதர்சனம் அப்பட்டமாய் கண்முன் நின்றது.

சனநாயகத்தின் தோல்வியும்,இன்றைய மக்களின் செயல்பாடுகளால் அது கேலிக்கூத்தாக மாறி இருப்பதும் முகத்தில் அறைந்தது.

எவ்விதக் குற்றவுணர்வும் இன்றி மாணவனால் கூறப்பட்ட பதில்,பிஞ்சு மனங்களில் விதைக்கப்பட்ட நஞ்சை வெளிப்படுத்துவதாய் இருந்தது.

இரு இரவுகள் உறக்கமின்றிக் கழிந்தன.வாக்கிற்கு பணம் பெறுதல் தவறு என்று உணராத இளைய தலைமுறையைக் கண்டு ஒரு ஆசிரியராகப் பெரும் குற்ற உணர்வு ஏற்பட்டது.

கேள்விகளில் இருந்து மட்டுமல்ல,சில நேரங்களில் பதில்களில் இருந்தும் கூட மாற்றங்கள் பிறக்குமல்லவா?

மாபெரும் விருட்சத்தின் விதை சிறியது அன்றோ?எமது மாணவர்களிடம் மன மாற்றத்தை ஏற்படுத்த முடிவு செய்தோம்!

மாற்றம் என்பது வெறும் சொல் அல்ல!மாபெருஞ்செயல்!

வெறுமனே சொற்களால் அறிவுரை கூறுவது எல்லா நேரங்களிலும் பயனுடையதாய் இராது.

செயல்பாடுகள் வழியே கற்றுக் கொள்ளுதலே  சிலையில் எழுத்தாம்.எம் மாணவரைச் செயல்படவைக்க முடிவு செய்தோம்.

வாக்கு விற்பனையின் தீமைகள் குறித்து படக்காட்சிகள்,

உரைகள் உள்ளிட்டவை மூலம் மாணவர்களுக்கு தெளிவை அளித்த பின்,ஒரு குறிப்பிட்ட நாளில் மாணவர்களைத் தனித்தனியாக "வாழ்த்து அட்டைகளைத்" தயாரிக்கச் செய்தோம்.

அவற்றில் தேர்தல் நாள் குறிப்பிடப்பட்டு,வாக்களிப்பதன் அவசியம் குறித்த படங்கள் மற்றும் விழிப்புணர்வு வாசகங்கள் மாணவர்களால் எழுதப்பட்டன.

உச்சமாக "வாக்கு விற்பனைக்கு அல்ல" எனும் வாசகம் வாழ்த்து அட்டைகளில்  பெரிதுபடுத்தப்பட்டு மாணவர்களால் எழுதப்பட்டது.

அவற்றை பெற்றோரிடம் அளித்து "வாக்களிக்கப் பணம் பெறமாட்டோம்" எனும் உறுதி மொழியைப் பெறச் செய்தோம்!

வாழ்த்து அட்டைகளை அளித்தவுடன் பெற்றோரின் பதில்கள் மற்றும் செயல்பாடுகளை அடுத்த நாள் மாணவர்கள் வகுப்பில் பகிர்ந்து கொண்டனர்.

"கொடுப்பதினால் பெறுகிறோம்" என்பதில் தொடங்கி "இல்லாததால் பெறுகிறோம்"வரை கலவையான விமர்சனங்கள் கிடைத்தன.

விமர்சனங்களைத் தாண்டி,இந்த விஷயத்தில் தாங்கள் செய்வது தவறு எனும் உணர்வு முதன் முறையாக மாணவர்களால் பெற்றோருக்கு ஊட்டப்பட்டது.

தொலைபேசியிலும்,நேரிலும் இது குறித்து சில பெற்றோருடன் உரையாடிய போது,கண்கள் கலங்கிய வண்ணம் நெகிழ்வுடன் தம் எண்ணங்களைப் பகிர்ந்து கொண்டனர்!

பிறர் அறிவுரையைக் கேட்டுப் பொங்கும் பெற்றோர் கூட, குழந்தைகளின் அன்புரையில் இருந்த நியாயத்தை உணர்ந்தனர்.தம் குழந்தைகள் குறித்த பெருமித உணர்வு கொண்டனர்!

அதன் பயனாய் வாக்கிற்குப் பணம் அளிக்க வீடுகளுக்கு வந்தோரைப் பெற்றோரும்,பெற்றோர் அனுமதியுடன் மாணவர்களும் திருப்பி அனுப்பும் நிகழ்வுகள் தொடங்கின.வெற்றிகரமாகத் தொடர்ந்தன.பெற்றோர் அனைவரும் வாக்களித்தனர்.பணம் பெறாமல்!திருப்பூர் மாநகரின் மாற்றம் தரும் ஒரு நிகழ்வாய் மாணவர்களின் இச்செயல்திட்டம் மாறியது.

அன்பு,கருணை,இரக்கம் ஆகிய அனைத்து நற்குணங்களின் ஆணிவேராய் இருப்பது நேர்மை.ஆனால் நேர்மை குணம் உடையோரை இந்தச் சமூகம் சற்று ஆச்சரியத்துடனே உற்று நோக்குவது விந்தையானது!

எதிர்கால இளைய தலைமுறை நேர்மையான மனிதர்களைக் கொண்டிருப்பின் இந்தப் பூமியே சொர்க்கப் பூங்காவாக மாறிவிடும்.

இன்றைய இளைய தலைமுறைக்குக் கற்பிக்க ஒரு ஆசிரியருக்கு மேம்பட்ட திறன்கள் தேவை.ஒரு ஆசிரியர் தனக்குத் தானே நேர்மையை வளர்த்துக் கொள்வதும்,அது மாணவரிடம் வளரத் தேவையான செயல்பாடுகளைத் திட்டமிட்டு வடிவமைத்தலும் இன்றைய சூழலில் பெருங்கடமையாகிறது.

"நம்பிக்கையுடன் தொடர்ந்து விதைத்துக் கொண்டே இருப்போம்!

முளைத்தால் மரம்! இல்லையேல் உரம்!" 

எனும் தோழர் சேகுவேராவின் வரிகளை ஒற்றி இனி தேர்தல்கள் வரும்போதெல்லாம் இது போன்ற நிகழ்வுகளைத் திட்டமிட்டு நடத்த தீர்மானித்துள்ளோம்.

கோடானு கோடி நீர்த்துளிகள் சேர்ந்ததே பெருங்கடல்.துளியான இந்நிகழ்வும் ஆழியாய் மாறுமென்ற நம்பிக்கையுடன் காத்திருக்கிறோம்!

எமது வகுப்பறை சார்ந்த பிந்தைய நிகழ்வுகளுக்கு இந்நிகழ்வு ஒரு துண்டுகோலாய் அமைந்தது.

நூறு சதவீதம் நேர்மையாக இருக்க வேண்டும் என்ற எமது எண்ணத்தை மேலும் வலுப்படுத்தி உறுதிப்படுத்துவதாய்,

நேர்மை என்பது வெறும் சொல் அல்ல,பெருஞ் செயல்! என்பதை உணர்த்துவதாய் மாணவனின் பதிலும்,அதனை ஒட்டி நிகழ்த்தப்பட்ட செயலும் அமைந்தன என்றால் அது மிகையில்லை!

- அகன்சரவணன்

ஸ்பேர் வீல் ஸ்டெப்னி ஆன கதை

சாதாரணமாக ஸ்டெப்னி என்று அழைக்கப்படும் ஸ்பேர் வீல்கள் வாகனங்கள் உருவான போது தயாரிக்கப்படவில்லை.அக்காலத்தில் குதிரை வண்டிகள் ஏராளமாகப் புழக்கத்தில் இருந்தன.அவை செல்லக் கூடிய தரத்திலேயே சாலைகளும் இருந்தன.மேலும் ஓடும்போது  குதிரைகளின் நகங்களும் சாலைகளில் ஆங்காங்கே விழுந்தன.

குதிரைகளின் நகங்கள் குத்தி வாகனங்கள் அடிக்கடி பஞ்சர் ஆகின.வாகனங்கள் வந்த புதிதில் இது பெரும் பிரச்சனையாக உருவெடுத்தது.மேற்கத்திய அரசுகள் இதனைத் தடுக்க பல்வேறு நடவடிக்கைகளை எடுத்தன.குதிரைகள் மற்றும் குதிரை வண்டிகள் வைத்துக்கொள்ள கட்டுப்பாடுகள் விதிக்கப்பட்டன.அரச குடும்பங்கள் செல்லும் பாதைகளின் ஓரம் வரிசையாக அடிமைகள் நிறுத்தப்பட்டு சாலைகளைப் பெருக்கச் செய்து கார்களின் சக்கரங்கள் பஞ்சர் ஆவதைத் தடுக்க முயற்சிகள் எல்லாம் மேற்கொள்ளப்பட்டன!

ஆயினும் இது உடனே சரிசெய்ய முடியாத பிரச்சனையாகவே இருந்து வந்தது.வால்டர் மற்றும் டாம் டேவிஸ் சகோதரர்கள் இந்தப் பிரச்சனைக்கு புதிய முறையில் தீர்வு கண்டனர்.ஆம்.அவர்கள் வாகனங்களின் டயர்கள் பஞ்சர் ஆனால் மாற்றுவதற்கு என்று ஸ்பேர் வீல்களைத் தயாரித்து விற்க ஆரம்பித்தனர்.

இங்கிலாந்தின் இலண்டன் நகரில் இருந்த  ஸ்டெப்னி எனும் தெருவில் வால்டர் டேவிஸ் மற்றும் டாம் ஆகியோர் ஸ்பேர் வீலை முதன்முதலில் தயார் செய்து விற்றதால் தெருவின் பெயரான ஸ்டெப்னி என்பதே ஸ்பேர் வீலுக்கு வைக்கப்பட்டது!அவர்களது நிறுவனத்தின் பெயர் ஸ்டெப்னி அயன் மாங்கர்ஸ்!

ஸ்டெப்னி நிறுவனம் வேகமாக வளர ஆரம்பித்தது.

ஸ்டெப்னி வீல் வாகன உரிமையாளர்களிடம் பிரபலம் அடைந்தது.அதனால் வாகன உற்பத்தி நிறுவனங்களே வாகனங்களில் ஸ்பேர் வீலை பொருத்தி வழங்க ஆரம்பித்தன. அதற்கான பெயர் ஸ்டெப்னி என்பதாகவே மாறியது.

இரப்பர் தட்டுப்பாடு காரணமாக வாகனங்களில்  ஸ்டெப்னி பொருத்துவதற்கு இரண்டாம் உலகப்போர் சமயத்தில் தடை விதிக்கப்பட்ட வரலாறும் உண்டு! 

 

இந்தியா இங்கிலாந்தின் கட்டுப்பாட்டில் இருந்த காரணத்தால்,ஸ்டெப்னி தயாரிப்பு நிறுவனம் இந்தியாவில் எளிதாக நுழைந்தது.

இந்தியாவிலும் ஸ்பேர் வீல் ஸ்டெப்னி ஆனது.

வல்லவனுக்கு வல்லவன் வையத்தில் உண்டு என்பது போல மேற்கத்திய நாடுகளில் மோட்டார் வாகனங்களில் ஸ்டெப்னி வருவதற்கு ஆயிரம் ஆண்டுகளுக்கும் முன்பே தமிழர்கள் தேர்ச்சக்கரங்களுக்கு ஸ்டெப்னி வைத்திருந்ததை புறநானூற்றுப் பாடல் மூலம் அறிந்து கொள்ள முடிகிறது!

ஸ்டெப்னி குறித்த புறநானூற்றுப் (102) பார்வை:

"கீழ் மரத்து யாத்த சேம அச்சு அன்ன"

-ஒளவையார்

சக்கரம் பழுதடையும் பொழுது பயன்படுத்துவதற்காகக் கூடுதலாக வண்டியில்  சேமத்திற்காக - பாதுகாப்பிற்காக- இணைக்கப்படுவதே சேம அச்சு.இத்தகைய சேம அச்சு போன்று மக்களுக்கு இடர் வரும் பொழுது அதனைக் களையும் சேம அச்சாக மன்னன் விளங்குகின்றான் என்கிறது ஸ்டெப்னி குறித்து சங்ககால புறநானூற்றுப் பாடல்!

- அகன்சரவணன்

மீம் கிரியேட்டர் :

சென்னையின் ஐந்து நட்சத்திர விடுதியின் அரங்கத்தில் அவர்கள் குழுமியிருந்தனர்.ஒருவருக்கு ஒருவர் அறிமுகம் இல்லாத புதிய நபர்கள்.சுமார் நூறு பேர் இருப்பார்கள். எதற்காக அங்கு வரவழைக்கப்பட்டு இருக்கிறோம் என்று இதுவரை அவர்களுக்குத் தெரியவில்லை.அவர்களின் மெயில் ஐடி மூலமாக தொடர்பு கொள்ளப்பட்டு,பொன்னான வாய்ப்பு என இங்கு வரவழைக்கப்பட்டு இருந்தனர்.சென்னை வருவதற்கான பயணக்கட்டணம்,தங்கும் இடம்,உணவு ஆகிய அனைத்துமே அவர்களுக்கு இலவசமாக ஏற்பாடு செய்யப்பட்டிருந்தன.ஆனால் எதற்காக இதெல்லாம்?இந்த கூட்டம் யாருக்காக? எதற்காக? என்று அவர்கள் யாருக்குமே புரியவில்லை.காத்திருந்தனர்.

அப்போது அரங்கின் கதவு திறக்கப்பட்டது. நாகரீகமாக உடை அணிந்த சிலர் மேடையில் வந்து அமர்ந்தனர்.அவர்களில் தலைவர் போல் இருந்த ஒருவர் மைக் முன்பு வந்து நின்றார்.அவர் என்ன கூற போகிறார் என கூட்டத்தில் இருந்த அனைவரும் ஆர்வத்துடன் காத்திருந்தனர்.தொண்டையைக் கனைத்துக் கொண்டு அவர் பேச ஆரம்பித்தார். "நண்பர்களே நாம் அனைவரும் ஒரு புதிய செயல் திட்டத்திற்காக இங்கு கூடியுள்ளோம். அது என்ன என்பதை தெரிவிக்காமலேயே உங்களை இங்கு வரவழைத்துள்ளோம்.அதற்கு முதலில் வருத்தத்தைத்தெரிவித்துக் கொள்கிறேன்.நாங்கள் தமிழகத்தின் மிகப் பிரபலமான ஒரு அரசியல் கட்சியின் தொழில்நுட்பக் குழுவினர்.எதிர்வரும் தேர்தலில் எங்கள் கட்சியை எப்படி வெற்றிபெறச் செய்வது என்பதற்கான வியூகங்களை வகுத்துக் கொடுப்பது எங்களுடைய முதன்மையான பணி.அதற்கும் உங்களுக்கும் என்ன சம்பந்தம் என்ற கேள்வி உங்கள் மனதில் எழலாம்.நீங்கள் ஒருவருக்கொருவர் அறிமுகமில்லாதவர்கள் ஆக இருக்கலாம்.ஆனால் உங்களுக்குள் ஒரு ஒற்றுமை இருக்கிறது.அது என்னவென்றால் நீங்கள் அனைவருமே தமிழகத்தின் மிகச்சிறந்த மீம் கிரியேட்டர்கள்!சரியா?" 

அவர்கள் தங்களுக்குள் ஒருவரை ஒருவர் பார்த்துக் கொண்டனர்.இப்போதுதான் தாங்கள் எதற்காக இங்கு அழைக்கப்பட்டிருக்கலாம் என்பதற்கான ஒரு மேம்போக்கான ஐடியா அவர்களுக்குக் கிடைக்க ஆரம்பித்தது!

அவர் தொடர்ந்தார்"நண்பர்களே நீங்கள் சமூகவலைதளங்களில் நிறைய மீம்களை போடுகிறீர்கள்.அதனால் உங்களுக்கு கிடைப்பது வெறும் லைக்குகளும்,பாராட்டுகளும் மட்டுமே.உங்களைப் போன்ற மீம் கிரியேட்டர்களுக்கே உங்களை அடையாளம் தெரியவில்லை.

இந்த கிரியேட்டிவிட்டி திறமையை வைத்து நீங்கள் ஏன் பணம் சம்பாதிக்க கூடாது?நீங்கள் அனைவருமே படித்த இளைஞர்கள்.போதுமான வேலை வாய்ப்பு இல்லாதவர்களும் பலர் இருக்கலாம்.சரியான வேலைக்கு சென்று கொண்டிருப்பவர்களும் இருக்கலாம்.ஆனால் பணத்தின் தேவை என்பது அனைவருக்குமே பொதுவானது தான்.நாங்கள் உங்களுக்கு தரக்கூடிய செயல் திட்டம் மிகவும் சுலபமானது.நீங்கள் இப்போது செய்து கொண்டிருக்க கூடிய அதே பணியை தொடர்ந்து செய்யப்போகிறீர்கள்.அதன் மூலம் பணம் சம்பாதிக்கப் போகிறீர்கள்!

நீங்கள் செய்ய வேண்டியது இதுதான்.எங்கள் கட்சி குறித்த பாசிட்டிவான மீம்களை உருவாக்குங்கள்.

அவ்வாறு உருவாக்கக்கூடிய மீம்களை நாங்கள் தரக்கூடிய மெயில் ஐடிக்கு அனுப்பி வையுங்கள்.எங்கள் தொழில்நுட்பக் குழு அதை ஆய்வு செய்து அது சரியானதாக இருந்தால் உங்களுக்கு அனுமதி அளிக்கும். அந்த மீம்களை உங்களுடைய சமூக வலைதளங்கள் மூலமாக நீங்கள் பரப்புங்கள்.அதற்குரிய பணம் உங்களுக்கு வழங்கப்படும்.மிகச் சுலபமான பணி.எங்கள் கட்சியின் கொள்கைகளை மிக சுலபமாக மக்களிடத்தில் எடுத்துச் செல்ல இந்த வியூகத்தை நாங்கள் வகுத்துள்ளோம்.இதில் உங்களுக்கு எந்த இடர்பாடும் இருக்க வாய்ப்பில்லை.மிகவும் சுலபம்.தினசரி சில மீம்களை கிரியேட் செய்கிறீர்கள்.அதை நாங்கள் தரக்கூடிய மெயில் ஐடிக்கு அனுப்புகிறீர்கள்.அதில் எங்கள் குழு ஒப்புதல் அளிக்கக் கூடிய மீம்களை நீங்கள் உங்கள் சமூக வலைதளங்களில் போஸ்ட் போடுகிறீர்கள்.அதற்கான தொகை உங்களுக்கு வழங்கப்படும் அவ்வளவே!

இதில் யாருக்காவது உடன்பாடு இல்லை என்றால் நீங்கள் இப்போதே இதிலிருந்து விலகிக் கொள்ளலாம்.இதில் கட்டாயம் எதுவுமில்லை.ஆனால் இது ஒரு பொன்னான வாய்ப்பு.உங்களைப் பற்றி யாருக்கும் தெரியப்போவதில்லை.நீங்கள் வழக்கமாக உங்கள் பணிகளையே பார்த்துக் கொண்டிருக்கப் போகிறீர்கள்.உங்களுக்கு பணம் வந்து கொண்டே இருக்கப் போகிறது. மிகவும் சுலபமான வேலைதான்."

அவர் பேசி விட்டு தன்னுடைய இருக்கையில் அமர்ந்தார்.அங்கிருந்த இளைஞர்கள் ஒருவரை ஒருவர் பார்த்துக்கொண்டனர். என்ன பதில் கூறுவது என்று அவர்களுக்குத் தெரியவில்லை.இதனை நாட்களாக தன்னுடைய சுய விருப்பத்தின் அடிப்படையில், தன்னுடைய எண்ணங்களை கேள்விகளை, கிண்டல்களாகப் பரப்பிவந்த அவர்களுக்கு, ஒரு அரசியல் கட்சி இது போன்ற ஒரு கூட்டத்தைக் கூட்டி தங்களுக்கு இந்த மாதிரி ஒரு செயல்திட்டத்தை அளிக்கும் என்றும், அதற்காகப் பணமும் அளிக்கும் என்பதை அவர்களால் நம்ப முடியவில்லை.யாருக்குமே இதில் மறுப்பு தோன்றவில்லை.அனைவரும்  ஏற்றுக்கொண்டார்கள்!

அவர்களுடைய வங்கி கணக்கு எண்கள் பெறப்பட்டன.அவர்களுக்கான மெயில் ஐடிகள் கொடுக்கப்பட்டன.கட்சியின் கொள்கை விளக்கங்கள் குறித்த கையேடுகள் வழங்கப்பட்டன.அவர்கள் அனைவரும் ஆடம்பரமான மதிய உணவை அருந்திவிட்டு மகிழ்வுடன் கலைந்து சென்றனர்.

அந்தக் கட்சியின் தொழில்நுட்பக் குழுவில் இருந்த ஒரு இளைஞனுக்கு இதில் உடன்பாடு இல்லை.இம்முறை வெற்றியடையும் என அவனுக்குத் தோன்றவில்லை.

இச்செயல் திட்டம் ஏன் வெற்றி பெறாது என்பதற்கு பல்வேறு காரணங்களைப் பட்டியலிட்டு அவன் விளக்கினான்.ஆயினும் அவனது கருத்து அங்கு மதிக்கப்படவில்லை!

பிரபல கட்சியின் இந்த செயல்திட்டம் அவர்களின் பிரதான எதிர்க்கட்சிக்கும் கசிந்தது!அவர்களும் இதே முறையைப் பின்பற்ற ஆரம்பித்தனர்!

மீம் கிரியேட்டர்களின் பணி தொடர ஆரம்பித்தது.

ஒவ்வொரு நாளும் தங்கள் கற்பனைக்கு எட்டிய,குறிப்பிட்ட அரசியல் கட்சி குறித்த பாசிட்டிவ் மீம்களை உருவாக்கினர்.அவற்றை அவர்களுக்கு ஒதுக்கப்பட்ட மெயில் ஐடிக்கு பகிர்ந்தனர்.அவற்றில் சிலவற்றிற்கு ஒப்புதல் கிடைத்தது.அவற்றை தங்களுடைய சமூக வலைதளங்களில் பரப்பினர்.இரு கட்சிகளுமே போட்டி போட்டுக் கொண்டு சமூக வலைதளங்களில் முட்டி மோதின!

தேர்தல் முடிந்து முடிவுகள் வந்தன.யாருமே எதிர்பாராத வகையில் இரண்டு கட்சிகளுமே படுதோல்வியைச் சந்தித்திருந்தன.புதியதாக ஆரம்பிக்கப்பட்ட ஒரு கட்சி ஆட்சியைப் பிடித்திருந்தது!

இரு கட்சிகளின் தொழில்நுட்ப அணியினருக்கும் இதனை ஏற்கவே முடியவில்லை.இது எப்படி என மூளையைக் குழப்பிக் கொண்டனர்.

இந்த செயல்திட்டம் பலன் அளிக்காது எனக் கூறிய அந்த இளைஞனுக்கும் இதில் குழப்பம் தான்.அவன் எதிர்பார்த்தபடி இச்செயல் திட்டம் தோல்வியில் முடிந்துவிட்டது.ஆனால் இரு கட்சிகளும் எப்படி தோற்றன என அவனுக்குப் புரியவில்லை.

தனது லேப்டாப்பை எடுத்து வைத்து மீம்களை ஆய்வு செய்யத் தொடங்கினான்.நீண்ட நெடிய போராட்டத்திற்குப் பின் அவன் அந்த நுட்பத்தைக் கண்டறிந்தான்.

இரு கட்சிக்குமே ஒவ்வொரு பாசிட்டிவ் மீமுக்கும் அடுத்த நொடியே ஏராளமான நெகட்டிவ் மீம்கள் போடப்பட்டு இருந்தன.மீமின் கான்செப்ட் புரிந்து அடுத்த நொடியே பதில் போட யாராலும் முடியாது.பாசிட்டிவ் மீமும் நெகட்டிவ் மீமும் ஒரே நபர் உருவாக்கினால் மட்டுமே இது சாத்தியம்.ஆமாம்!ஒவ்வொரு மீம் கிரியேட்டரும் அவரின் மீம்களுக்கு அவரே பேக் (போலி)ஐடி மூலம் எதிர் மீம்கள் போட்டுள்ளார்!

என்றுமே கிரியேட்டர்கள் சுயமாகத்தான் சிந்திப்பார்கள்.

எவ்வளவு பணம் கொடுத்தாலும்,கட்சித் தொண்டர்கள் போல தலைமை கூறுவதை எல்லாம் அவர்கள் கேட்க மாட்டார்கள்.அவர்களை அரசியல் கட்சிகள் பயன்படுத்தவே முடியாது.எனவே இந்த செயல் திட்டம் வெற்றி பெற வாய்ப்பே இல்லை என்பதைத் தான் எடுத்துக் கூறியும் ஏற்காத தன் அணி சீனியர்களுக்கு தோல்விக்கான காரணத்தை விளக்க வேகமாகச் செல்ல ஆரம்பித்தான் முன்னாள் மீம் கிரியேட்டரான அந்த இளைஞன்!

- அகன்சரவணன்

வாசிப்போம்! உலகை நேசிப்போம்!

அறிவு வளர்ந்து முதிர முதிர வாய் தன் வேலையைக் குறைத்துக் கொள்ளுமாம்.அந்த வகையில் அறிவை முதிரச் செய்வன புத்தகங்கள்.

லாரிபேஜ் மற்றும் செர்கிபிரின் இருவரும் இணைந்து கூகுள் நிறுவனத்தை உருவாக்கினர்.அமெரிக்க பணக்காரர்கள் வரிசையில் தற்போது இவர்கள் 9 மற்றும் 10 ஆம் இடத்தில் இருக்கிறார்கள்.இவர்கள் இருவரும் தற்போது கூகுளின் தாய் நிறுவனமான ஆல்பாபெட் நிறுவனத்தின் தலைமைப் பொறுப்பில் (CEO) இருந்து விலகி,அனைத்துப் பொறுப்புகளையும் சுந்தர் பிச்சையிடம் கொடுத்துள்ளனர்.

சரி இனி இவர்கள் என்ன செய்யப்போகின்றனர் என்றால்,புதிய கண்டுபிடிப்பில் தங்கள் கவனத்தைச் செலுத்த வேண்டி தீவிரமாக புத்தகம் வாசிக்கப் போகின்றனராம்! 

தீவிரமான புத்தக வாசிப்பின் மூலம் புதிய சிந்தனைகளையும்,அதன் மூலம் புதிய கண்டுபிடிப்புகளையும் முன்னெடுக்க உள்ளதாக மகிழ்ச்சி பொங்கத் தெரிவித்துள்ளனர்.

கூகுள் நிறுவனத்தை உருவாக்குவதற்கு முன்பும் இருவரும் தீவிர புத்தக வாசிப்பாளர்களே.புத்தக வாசிப்பின் மூலமே புதிய சிந்தனையைப் பெற முடியும் என்று இவர்கள்  நம்பினர்.அது கூகுளின் வளர்ச்சி மூலம் இன்று நிரூபிக்கப்பட்டுள்ளது.

எல்லாவற்றுக்கும் இணையத்தையே,

குறிப்பாக கூகுளையே நம்புவோர்க்கு,புத்தக வாசிப்புதான் புதிய சிந்தனையைத் தரும் என்பதை கூகுள் நிறுவனர்கள் தங்களின் வெற்றி மூலமே நிரூபித்துள்ளனர்.அடுத்து இவர்கள் என்ன கண்டுபிடிக்கப் போகிறார்கள் என உலகமே இன்று இந்த புத்தகக் காதலர்களுக்காகக் காத்துக்கொண்டு இருக்கிறது.

இணைய அறிவே வேண்டாமா? என்றால் அவசியம் வேண்டும்!உணவாக அல்ல!ஊறுகாயாக!

இணையம் மூலம் நாம் அறிவது தகவல்கள் மட்டுமே.சுய சிந்தனையே கண்டுபிடிப்புகளின் தாயாகும்.அதற்கு அடித்தளமிடுபவை புத்தகங்களே.

நீங்கள் சிலநாட்களுக்கு முன் இணையம் மூலம் தேடிப் பெற்ற தகவல் தற்போது உங்களுக்கு நினைவில் இருக்காது.ஆனால் எப்போதோ சிறு வயதில் படித்தவை உங்கள் நினைவில் இருக்கும்.ஏனெனில் இணையம் தகவல்.புத்தகம் அறிவு.

அன்பு நண்பர்களே,நேரமில்லை என்று சாக்கு கூறுவதை உதறிவிட்டு புத்தகவாசிப்பின் பக்கம் உங்களின் கவனத்தைத் திருப்புங்கள்.

குழந்தைகளையும் வாசிக்க ஊக்குவியுங்கள். புத்தகங்களைக் குழந்தைகளுக்கு பரிசாகக் கொடுங்கள்.உங்கள் குழந்தைகளுக்கு உங்களின் மிகச்சிறந்த வழிகாட்டலாக இது அமையும்.2020 ஆம் ஆண்டிற்கான உங்களின் சபதமாக இது அமையட்டும்.

அடுத்தவர் அறிவைக் கடன் வாங்கிக் கொண்டு இருக்காமல் சுயமாகச் சிந்திப்போம்.புதிய புதிய கண்டுபிடிப்புகளை நமது குழந்தைகள் உருவாக்கத் தூண்டுவோம்.

வாசிப்போம் உலகை நேசிப்போம்!

அகன்சரவணன்

9659746646

2019 இன் நினைவுகள் 50

2019 ஆம் ஆண்டில் மேற்கொள்ளப்பட்ட பல்வேறு செயல்பாடுகளில் எம் நினைவில் இடறும் சிறந்த 50 செயல்பாடுகளின் பட்டியல் :


1)CODISSIA வில் நடைபெற்ற Coimbatore Science and Technology Festival இல் எமது மாணவர்கள் மூவர் தேர்வு செய்யப்பட்டு தமது படைப்பை கண்காட்சியில் காட்சிப்படுத்தினர்-6/1/19

2)Telescope மூலம் வானத்தை உற்று நோக்கும் Skywatch Program OSF சார்பில் பள்ளிவளாகத்தில் நடைபெற்றது.திரளான பார்வையாளர்கள் வானத்தை உற்றுநோக்கி வானியலைக் கற்றனர் -12/1/19

3)பிளாஸ்டிக் வாட்டர் பாட்டிலுக்கு பதில் சில்வர் வாட்டர் பாட்டிலை மாணவர்கள் முழுமையாகப் பயன்படுத்தத் தொடங்கினர் -21/1/19

4)திருப்பூர் புத்தகத் திருவிழாவில் எமது மாணவியர் இருவரது படைப்புகள் காட்சிப்படுத்தப்பட்டன-5/2/19

5)VVM Observer ஆக பணியாற்றியமைக்காக VIBHA சார்பில் சான்று வழங்கப்பட்டது - 5/2/19

6)சிறுகச் சிறுக சேமித்த எமது மாணவர்கள் திருப்பூர் புத்தகத் திருவிழாவிற்கு பள்ளி மூலமாக அழைத்துச் செல்லப்பட்டு,சுமார் 5000/ ரூபாய்க்கு புத்தகங்களை ஆர்வத்துடன் வாங்கினர்-6/2/19

7)ஆனந்த விகடனில் "முன்மாதிரி அரசுப் பள்ளி" எனும் சிறப்புக் கட்டுரை வெளியானது -23/2/19

8)மண்டல அறிவியல் மையத்தில் தேசிய அறிவியல் தினத்தை ஒட்டி நடைபெற்ற நிகழ்விற்கு எமது மாணவர்கள் மூவர் தேர்வு செய்யப்பட்டு நிகழ்வில் கலந்து கொண்டு வானியலை நேரடியாகக் கற்றனர்-28/2/19

9)எமது மாணவியின் Coin Vending Machine கூகுள் நிறுவனத்தால் சிறந்த கண்டுபிடிப்பாகத் தேர்வு செய்யப்பட்டு சான்றிதழ் வழங்கப்பட்டது-29/2/19

10)Plickers எனும் Online மதிப்பிடும் முறையில் மாணவர்கள் மதிப்பிடப்பட்டனர் -2/3/19

11)மாவட்ட அளவிலான துளிர் Tallent Test இல் எமது மாணவர் முதலிடம் பெற்றார் -11/3/19

12)"பூங்காற்று" எனும் பெயரில் எமது மாணவர்களே மாத இதழ் வெளியிட ஆரம்பித்தனர்-12/3/19

13)FSSAI எனும் மத்திய உணவுப்பாதுகாப்புத் துறையின் Health and Wellness Co-ordinator அங்கீகாரம் கிடைத்தது-18/3/19

14)வாக்களிக்கப் பணம் பெறக்கூடாது எனும்  எமது மாணவர்களின் "வாக்கு விற்பனைக்கு அல்ல" செயல் திட்டம் வெற்றிகரமாகத் தொடங்கியது-23/3/19

15)ஒரு கல்லில் இரு மாங்காயாக ஒரே நாளில் எமது மாணவர் மூவர் "பசுமைப் பாதுகாவலர் விருதும்" ஐவர் "இளம் விஞ்ஞானி"விருதும் பெற்றனர் -28/3/19

16)PSLV C-45 இராக்கெட் ஏவுதலை மாணவர்கள் நேரடி ஒளிபரப்பாக முதன் முதலில் கண்டு வியந்தனர் -1/4/19

17)கோடைகாலத்தில் பறவைகளின் தாகம் தீர்க்க மொட்டை மாடிகளில் நீரும் தானியங்களும் வைக்கும் செயல்திட்டம் ஆரம்பிக்கப்பட்டது -9/4/19

18)NMMS தேர்வில் எமது மாணவர் இருவர் வெற்றி பெற்று தொடர் கல்வி உதவித் தொகைக்குத் தகுதி பெற்றனர் -20/4/19

19)Azim Premji Foundation அமைப்பிடம்
"Creating a thirst for reading among the students..." எனும் செயல்திட்டம் சமர்ப்பிக்கப்பட்டு ஏற்புடைமை பெற்றது -8/5/19

20)கல்வியாளர்கள் சங்கமம் அமைப்பு "நம்பிக்கை 2019" விருது வழங்கி கெளரவித்தது-12/5/19

21)Tamilnadu Digital Team அமைப்பு"ஒளிரும் ஆசிரியர் விருது" வழங்கி கெளரவித்தது-5/7/19

22)தினமலர் நாளிதழில் "திருப்பூரில் குட்டி இஸ்ரோ'' என்ற பள்ளி குறித்த சிறப்புக்கட்டுரை வெளியானது -7/7/19

23)இந்து நாளிதழில் "அறிவியல் தொழில்நுட்பத்தில் அசத்தும் மாநகராட்சிப் பள்ளி" எனும் சிறப்புக்கட்டுரை வெளியிடப்பட்டது -9/7/19


24)சிந்தனைத் திறனறிதல் போட்டியில் வென்ற 4 மாணவர்கள் சந்திரயான் 2 ஏவுதலை நேரடியாகக் காண இஸ்ரோ அழைத்துச் செல்லப்பட்டனர்-15/7/19

25)சந்திரயான் 2 ஏவுதல் ஒத்தி வைக்கப்பட்டதால் மீண்டும் மாணவர்கள் நால்வர் இஸ்ரோ அழைத்துச் செல்லப்பட்டனர் -22/7/19

26)அறிவுச் சுரங்கமான சென்னை அண்ணா நூற்றாண்டு நூலகத்திற்கு மாணவர்கள் அழைத்துச் செல்லப்பட்டனர் - 23/7/19

27)தேசியக் கொடியினுள் தாவர விதைகள் வைக்கப்பட்டு "முளைக்கும் தேசியம்" செயல் திட்டம் தொடங்கப்பட்டது -15/8/19

28)Space Quiz இல் வெற்றி பெற்றமைக்காக Mygov & ISRO சான்றிதழ்கள் வழங்கப்பட்டன -18/8/19

29)மாணவர் நேர்மையை ஊக்குவிக்கும் வகையில் "நேர்மைக்கடை" திறக்கப்பட்டது - 27/8/19

30)"புதிய தலைமுறை ஆசிரியர் விருது" வழங்கப்பட்டது -31/8/19

31)OSF-INTERNATIONAL ASTRONOMICAL UNION(IAU)-அமைப்பின் Under One Moon-செயல்திட்டத்தில் எமது மாணவர் 30 பேரின் படைப்புகள் IAU இணையதளத்தில் வெளியிடப்பட்டன -15/9/19

32)OMR Sheet மூலம் எமது மாணவர்கள் மதிப்பீடு செய்யப்பட்டனர் -18/9/19

33)Virtual Reality Show (VR) மற்றும் Augmented Reality Show (AR)ஆகியன ஆரம்பிக்கப்பட்டன - 20/9/19

34)KPR கல்லூரியில் நடைபெற்ற Annular Solar Eclipse நிகழ்வில் எமது மாணவர் 20 பேர் தேர்வு செய்யப்பட்டு கலந்து கொண்டனர் - 28/9/19

35)தமிழக வனத்துறை சார்பில் நடைபெற்ற ஓவியப்போட்டியில் எமது மாணவன் மாவட்ட அளவில் முதல் பரிசு பெற்றார் - 4/10/19

36)Sri Aurobindo Society and HDFC Parivartan's ZIIE இன் Teacher Innovative Award கிடைத்தது - 5/10/19

37)OSF இன் Fellowship க்காக மாணவர்களுடன் கலந்துரையாட டெல்லியில் இருந்து  ChangeLooms அமைப்பினர் பள்ளிக்கு வருகை புரிந்தனர் -7/10/19

38)STEM Project இல் வெற்றி பெற்றதற்காக OSF அமைப்பின் முதலாவது Open Science Centre பள்ளியில் தொடங்கப்பட்டது - 19/10/19

39)Screen Magnification தொழில்நுட்பம் மூலம் மாணவர்கள் படக்காட்சிகளைக் காண ஆரம்பித்தனர்-22/10/19

40)இலஞ்சம் மற்றும் ஊழல் குறித்து பல்வேறு செயல்பாடுகளை மேற்கொண்டதற்காக Central Vigilance Commission சார்பில் பாராட்டு சான்றிதழ் வழங்கப்பட்டது -31/10/19

41)தொடுதிரை கல்வி முறையின் சாதகபாதகங்கள் குறித்த பள்ளியின் பார்வை கட்டுரை தினமலர் நாளிதழில் வெளியிடப்பட்டது3/11/19

42)OSF இன் OSC க்காக தொலைநோக்கி பள்ளிக்கு பரிசாகக் கிடைத்தது7/11/19

43)ISRO தலைவர் திரு.சிவன் அவர்கள் எமது 4 மாணவர்களுக்கு கடிதம் அனுப்பினார் -10/11/19

44)Telescope தொழில்நுட்பம்,பொருத்தும் மற்றும் கையாளும் முறைகள் மாணவர்களுக்கு விளக்கப்பட்டது -23/11/19

45)OSC செயல்பாடுகளுக்காக மாணவர்களுக்கு  Activity Log Book வழங்கப்பட்டது - 23/11/19

46)மத்திய அரசு நிறுவனங்களான Vijnan Bharati,Vijian Prasar மற்றும் NCERT இணைந்து நடத்திய VVM-Online தேர்வை எமது மாணவர்கள் எழுதினர் - 24/11/19

47)PSLV C47 Launch காண 5 மாணவர்கள் ISRO அழைத்துச் செல்லப்பட்டனர் -27/11/19

48)தினமலர் சார்பில் "லட்சிய ஆசிரியர் விருது" வழங்கப்பட்டது -20/12/19

49)Solar Filters மூலமாக எமது மாணவர்கள் நேரடியாக சூரியனை உற்றுநோக்கினர் -26/12/19

50)பல்வேறு ஊடகங்கள் மற்றும் இணையதள செய்திகளில் பள்ளியின் சிறந்த செயல்பாடுகள் குறித்த கட்டுரைகள் ஆண்டு முழுதும் தொடர்ந்து வெளிவந்தன.

மொத்தத்தில் இந்த 2019 ஆம் ஆண்டு மிகச் சிறந்த,புதுமைகள் நிறைந்த,மாணவர்களின் சுய சிந்தனைக்கு வாய்ப்பளித்த
ஆண்டாகவே அமைந்தது.

ஆண்டொன்று போனால் வயதொன்று கூடும் என்று இருந்துவிடாமல்,இவற்றைவிட சிறந்த செயல்திட்டங்களை முன்னெடுக்க வேண்டும் என்ற தீவிர ஆர்வத்துடன் 2020 ஆம் ஆண்டை எதிர்நோக்கி ஆவலுடன் காத்திருக்கிறோம்
👍🙏